မင်းကိုနိုင်များစွာအတွက် သမ္မတကြီးရဲ့ ၀ိမုတ္တိခြင်တစ်ကောင်(၁)

မင်းကိုနိုင်များစွာအတွက် သမ္မတကြီးရဲ့ ၀ိမုတ္တိခြင်တစ်ကောင်(၁)

(၁)

လှောင်ပိတ်ခြင်းကို ဖြစ်စေ၊ နှောင်ဖွဲ့ခြင်းကိုဖြစ်စေ သူက ထိတ်ပြာတတ်မြဲဖြစ်သည်။ လုံခြုံမှု၊သို့မဟုတ် ရာသီဥတုကို ကာကွယ်ရန်၊ သို့မဟုတ် အခြားအကြောင်းတစ်ခုခုအတွက် သူကိုယ်တိုင်ပိတ်ထားမိသော သူ့အခန်းကျဉ်းလေး၏ တံခါးချပ်များကိုပင် မကြာခဏ ထကာ ဖွင့်မိသည်ချည်းပင်..။ မွန်းကြပ်မှုများကို သူ ခံနိုင်ရည်မရှိပါ..။ သို့အတွက် အနှောင်အဖွဲ့နှင့် လှောင်ပိတ်မှုဒဏ်ချက်များ၏ အမှောင်ထုတွင် အေးခဲနေသောနှလုံးသားများကို သူစာနာမိပါသည်။

ဗုဒ္ဓအရှင်သည်ပင် မိဂဒါဝုန်မိုးခိုနေ့ရက်များ ကုန်ဆုံး၍ သာသနာပြုခရီးထွက်ခွာမည့် ရဟန်းတော်များအား သြ၀ါဒမှာတမ်းချွေရာတွင်
'' မုတ္တာဟံသဗ္ဗပါသေဟိ.....တုမှေပိ ဘိက္ခဝေ မုတ္တာ သဗ္ဗပါသေဟိ...(ငါကိုယ်တော် အနှောင်အဖွဲ့ကျော့ကွင်းအားလုံးမှ လွတ်မြောက်ပြီးဖြစ်သလို သင်ရဟန်းတို့လည်း လွတ်မြောက်ပြီးကြလေပြီ'' ဟူသော စကားရပ်တော်ကို တခုတ်တရထည့်သွင်းမိန့်မှာခဲ့သည်ကို သူ ကျေနပ်မိလေသည်။ ငါတို့လွတ်မြောက်ကြပြီ တဲ့...။
မလွတ်မြောက်သေးသော သူစိမ်းတရံစာတို့ရှိရာဆီ တရွေ့ရွေ့ထွက်ခွာကြွသွားသော သာသနာပြုရဟန်းတို့၏ သက်စွန့်ဆံဖျားတောတောင်ခရီးကြမ်းကို သူ လွမ်းလိုက်မိပါသည်..။

အိပ်မက်များ၊ဝေဒနာက္ခန္ဓာများ၊နေရောင်ခြည်နှင့် စိမ်းလန်းသော အပြုံးများဝေးရာဆီမှာ လှောင်ပိတ်မိနေသည့် တီးတိုးအသက်ရှူသံများဆီ သြဒိဿမေတ္တာ၊ တစ်ခါတရံမှာတော့ အနောဒိဿမေတ္တာပို့သမိမြဲပင်ဖြစ်ပါသည်။

(၂)

ယမန်နေ့(၁၃-၀၁-၂၀၁၂) နံနက်ခင်းဆီက သူသည် တိဘက်တက္ကသိုလ်စာသင်ခန်းဆီ တက်ကြွသောခြေလှမ်းကြဲကြဲတို့ဖြင့် ရောက်ရှိသွားခဲ့လေသည်။ တွေ့သမျှ လူတိုင်းကို သိသိ မသိသိ ပြုံးပြဖြစ်ခဲ့သည်။ တစ်ခါမှ သူ၏ နှုတ်ဆက်ခြင်းကို မခံရဖူးသော ဂိတ်စောင့်ကုလားကိုပင် သူက နမာစတေး ဟု နှုတ်ဆက်ဖြစ်အောင် နှုတ်ဆက်လိုက်သေးသည်။

ဂိတ်စောင့်ကုလားက ကြောင်အန်းအန်းဖြစ်ကာ နမာစတေး ဂုရုဂျီဟု ကမန်းကတန်း ဆလံပြန်ပေးလေသည်။

သူ့ပါဠိစာသင်ခန်းလေးသို့ ရောက်သောအခါ ဗုဒ္ဓဂယာဒီဇင်ဘာ ဘုရားဖူး ခရီးသွားကြသော တပည့်လားမားဘုန်းကြီးလေးအချို့က ပြန် ရောက်မလာသေးသည့်အတွက် သူ့သင်ခန်းစာအသစ်မစနိုင်။
ရိဂဆန်ဆန်ဖဲဆိုသော လားမား ဘုန်းတော်ကြီးလေးနှင့် ကျောင်းသူလေးဖန်တောခ်တို့ကို တနင်္လာနေ့မှ စကြမယ်ဆိုလိုက်သည်နှင့် တပည့်ကျော်များ၏ မျက်နှာများက နက္ခတ်ပွဲ သဘင်ဖြစ်သွားဟန် လင်းပသွားကြလေသည်။

သြစတြီးယားတက္ကသိုလ်ကျောင်းသူ မစ္စ်ဒိုရ်တီကတော့ ယခင်နှစ်ဝက်က သင်ယူလက်စ သုတ္တနိပါတ်ကို ဆက်လက်လေ့လာရန် စိတ်အားထက်သန်နေခဲ့သည်။

ဘာပဲဖြစ်ဖြစ် ဒီနေ့တော့ ကျောင်းပိတ်ရပါလိမ့်မည်..။ တံခါးချပ်တွေ ကာရံထားသော စာသင်ခန်းကျဉ်းကျဉ်းလေးတွင် သူကိုယ်တိုင်ရော ..သူတပည့်များပါ မည်သူမှ လှောင်ပိတ်မနေကြစေလို..။
ဗုဒ္ဓအရှင်ကတော့ '' ငါတို့ လွတ်မြောက်ကြလေပြီ'' တဲ့.။
သူကတော့ '' သူတို့ လွတ်မြောက်ကြလေပြီ '' ဟု ခပ်ကြွားကြွား ရွတ်ဆိုမိတော့သည်။

အင်တာနက်စာမျက်နှာပေါ်က တံခါးများတစ်ချပ်ပြီးတစ်ချပ်ပွင့်လာသည်။ မင်းကိုနိုင်နှင့် မျှော်လင့်ချက်များ...။ အိပ်မက်များ..။ စည်းလုံးမှုများ..။ အနာဂတ်များ..အပြုံးများ..။ဝေးကနဲ အော်ဟစ်မြူးပျံနေသော အသံချိုချိုပြင်းပြင်းများ..။
ရင်ခုန်ချင်စရာကောင်းသောနာရီလက်တံအရွေ့တိုင်းတွင် သူလည်း မင်သက်ကာမျောပါနေလေသည်..။

မုဒိတာစင်မြင့်တွင် သူအပါအ၀င် အရေအတွက် ကိန်းဂဏန်းအနှိုင်းအဆမဲ့သော ကမ္ဘာ့ပြည်သူတို့ ရပ်နေကြလေသည်ကော..။
ထိုရောအခါမှ လွန်ခဲ့သော ဆယ်စုနှစ်တစ်ခုဆီက ၀ိမုတ္တိခြင်တစ်ကောင်ကို သူအမှတ်ရကာ ရဲရဲပြုံးမိသွားလေသည်။
(ဆက်ရန်)

မင်းကိုနိုင်များစွာအတွက် သမ္မတကြီးရဲ့ ၀ိမုတ္တိခြင်တစ်ကောင်(၂)

(၃)

ခရစ်နှစ် ၂၀၀၀ ပြည့်ချိန်တွင် သူ၏ မန္တလေးသာသနာ့တက္ကသိုလ်လေးနှစ်တာပညာသင်ခရီးပြီးဆုံး၍ သာသနာပြုရဟန်းတော်တစ်ပါးအဖြစ် (၂)နှစ်တာ ဆက်လက်တာဝန်ထမ်းဆောင်ရန် ရှမ်းပြည်နယ်အရှေ့ပိုင်းကျိုင်းတုံ၊(သို့မဟုတ် ) ခေမရဋ္ဌ်သို့ ဦးတည်ခဲ့ရပါလေသည်။ သာသနာ့တက္ကသိုလ်တွင် လေးနှစ်တာ ပညာသင်ယူပြီးပါက (အကယ်၍ မဟာဝိဇ္ဇာတန်းတက်ရန် အရွေးအချယ်မခံရလျင်) တောင်တန်းနှင့် နယ်စပ်ဒေသများသို့ နှစ်နှစ်တာ သာသနာပြုသွားရမြဲဖြစ်ပါသည်။

အချို့သော မိတ်ဆွေရဟန်းတော်များက မဟာဝိဇ္ဇာတန်းတက်ခွင့် မရ၍ စုတ်တသပ်သပ်ဖြစ်နေချိန်တွင် သူကတော့ စာမျက်နှာအသစ်များကို ဖတ်ရန် စိတ်စောနေခဲ့သည်။ အမှန်တကယ်ပင် ထိုနှစ်နှစ်တာကာလသည် သူ့စိတ်ကို အတော်အတန်ရင့်မှည့်စေခဲ့သည်။ ကျောင်းပရိဝုဏ်ပြင်ပက လောက၀ိဟာ ပညာနယ်ပယ်တွင် သူုဖတ်မှတ်နေသော စာအုပ်များထက် ကျယ်ဝန်းလှသည့် သင်ယူစရာပရိယတ်များကို အံ့သြကုန်နိုင်ဖွယ် တွေ့ခဲ့ရလေသည်။

သို့လျင် သူသည် ထေရ၀ါဒဗုဒ္ဓသာသနာပြုရဟန်းတော်ခန့်အပ်လွှာအမိန့်ကြော်ငြာစာရွက်တစ်ရွက်၊ လေယာဉ်လက်မှတ်တစ်စောင်၊ ''သာသနဿ ဘာရော အ၀ဿံ ၀ဟိတဗ္ဗော ''(သာသနာ့ဝန်ကို မချွတ်ထမ်းဆောင်ပါမည်) ဟု ထင်ရှားစွာ ရိုက်နှိပ်ထားသော အ၀ါရောင်သာသနာပြရဟန်းကဒ်တစ်ခု နှင့် ဖတ်မှတ်စရာစာအုပ်အနည်းငယ်ပါသော ၀န်စည်စလွယ်အိတ်ကို ဆွဲကာ ပထမဆုံးအကြိမ် သမားရိုးကျစာသင်သားဘ၀နေ့ရက်များမှ ခွဲထွက်ကာ တောင်တန်းပြာပြာများဆီ ရင်ခုန်စွာ ထွက်ခွာခဲ့လေသည်။

သာသနာပြုခရီးဟူသည် မျက်လွှာကလေးကိုချ၊ သပိတ်ကလေးကို ပိုက်၊ ယတ်တောင်ကလေးကို ထမ်းကာ ပန်းခင်းသောလမ်းကို လျှောက်ရလေသည်မဟုတ်ခဲ့။ သင်းပိုင်သင်္ကန်းကို တိုတိုဝတ်၊ စားနပ်ရိက္ခာဝန်စည်စလွယ်နှင့် ကျောပိုးအိတ်ကို လွယ်၊ လျှိုမြောင်အသွယ်သွယ်၊ တောင်အထပ်ထပ်ကို တောနင်းဖြတ်ရပါလေသည်။ ယခင်က အစိုးရအဆက်ဆက် အာဏာစက် လက်လှမ်းမမှီခဲ့ရာ လားဟူ၊အာခါ၊ ၀ စသော တိုင်းရင်းသားတို့၏ မိုးမြင့်ခေါင်ဖျားက ရွာလေးတွေဆီ သူရောက်ခဲ့ရသည်။

လမ်းခရီးက အင်ဒီယာနာဂျုံးဆန်ဆန်စွန့်စားရသည်မို့ သာသနာပြုကွက်ရွာလေးတွေဆီ ရောက်သည်နှင့် ပြန်လှည့်ရမည့် လမ်းအတွက် သူ မောနေမိတော့သည်။ လေတဟူးဟူးတိုက်ခတ်နေသော တောင်ကုန်းလွင်ပြင်များ၊ နွယ်ကြိုးများကို ဆွဲတက်ရသည့် မတ်စောက်သော တောင်ကမ်းပါးယံများ၊ ချော်ကျသွားလျှင် ဟု အမြဲအတွေးပွားကာ ခြောက်လှန့်နေသော တောင်စောင်းရှိ လူသွားလမ်းကျဉ်းကျဉ်းလေးများ..။ ဟူး....

အသိဥာဏ်မှောင်ပိန်းသော သွေးချင်းများ၏ ဘ၀၊ အဆုံးအမသာသနာမရှိ၊ ယဉ်ကျေးမှုမရှိ၊ အက်တီကက်မရှိ၊ နှစ်ဆယ့်တစ်ရာစုနှင့် ဂလိုဘယ်လိုက်ဇေးရှင်းသည် တောင်ခိုးဝေေ၀ သားချင်းတို့မြေဆီ မရောက်သေး..။

သာသနပြုတာဝန်ဆိုသည်က မောဟအကျဉ်းထောင်တွင် မှောင်ပိန်းလှောင်ပိတ်နေကြသူတွေကို အသိဥာဏ်ဝိဇ္ဇာလွင်ပြင်ဆီ ထုတ်နှုတ်ဆွဲခေါ်နိုင်ရေးပင်မဟုတ်လား..။ ထိုသို့ တွေးမိကာမှ ရွှေပြည်တော်၏ ပြည်မထဲက ရွှေရောင်တ၀င်းဝင်းနှင့် အလုပ်တာဝန်ဟင်းလင်ဖြစ်နေသော သာသနာပြုခေါင်းစီးအောက်က ကျောင်းကြီးဝိဟာတို့ကို သူ ချဉ်စူးစူးဖြစ်ခဲ့မိသေးသည်။ ဇရပ်တဲသာသာ အင်ဖက်မိုး ၀ါးထရံကာ သာသနာပြုကျောင်းလေးတွေမှာ စာအံသံလေးများကြားရဖို့ နှစ်ရှည်လများ ဇွဲသန်စွာ စည်းရုံးသာသနာပြုနေကြသည့် ရဟန်းတော်များကို သူ ဦးညွတ်ခဲ့မိလေသည်။

(၄)

သာသနာပြုလုပ်ငန်းဟူသည် အုပ်ချုပ်သူအစိုးရမင်းတို့၏ အထောက်အပံ့သာ မရလျှင် ပန်းတိုင်ပျောက်စေနိုင်လေသည်။ ဗုဒ္ဓအရှင်သည်ပင် မဇ္ဈိမဒေသ၏ အင်အားကြီးမားလှသောမဂဓတိုင်း၊ ကောသလတိုင်းစသော ဘုရင်ဧကရာဇ်တို့ကို ဓမ္မဖြင့် စည်းရုံးကာ သာသနာပြုလမ်းကြောင်းချဲ့ထွင်နိုင်ခဲ့သည်ကို လင်းလင်းချင်းချင်းရှိကြပေလိမ့်မည်။

သူ ရှမ်းပြည်အရှေ့ပိုင်းသို့ ချေချမိသည်နှင့် စစ်ဘက် နယ်ဘက်ဆိုင်ရာ ဌာနအသီးသီး၊အာဏာပိုင်အဖွဲ့အစည်းအမျိုးမျိုး၊ ပြည်ခိုင်ဖြိုး၊မိခင်နှင့်ကလေးစောင့်ရှောက်ရေး၊ မြန်မာနိုင်ငံအမျိုးသမီးရေးရာ၊ နယ်စပ်စည်ပင်စသော ဝေါဟာရများနှင့် ရင်းနှီးကျွမ်းဝင်ရလေသည်။

သာသနာပြုဗဟိုဌာနတွင် တာဝန်ကျသာသနာပြုရဟန်းတော်လေးပါးတွင် သူက ၀ါအငယ်ဆုံးဖြစ်ရာ (ရံခါ တောင်ပေါ်သာသနာပြုဌာနများသို့ ကွင်းဆင်းရသည်မှအပ) သူဝါသနာပါသည့် သင်ကြားရေးတာဝန်ကို စီနီယာရဟန်းတော်များက လွှဲအပ်ကြသဖြင့် အစိုးရနှင့် အစိုးရမဟုတ်သော အဖွဲ့အစည်းများက ဖွင့်လှစ်သည့် ဗုဒ္ဓဘာသာသင်တန်းများကို ပို့ချပေးခဲ့ရသည်။

ထိုမျှမက သူက သာသနာပြုဌာနသို့ ရောက်ပြီးမကြာမီမှာပင် အင်္ဂလိပ်စာသင်တန်းလေးများကိုလည်း အတန်းစုံကျောင်းသူကျောင်းသားများအတွက် ဖွင့်လှစ်ဖြစ်ခဲ့သည်။ သာသနာပြုဗဟိုဌာနက တည်ထောင်စ၊ ဆောက်လက်စကျောင်းဆောင်များက မပြီးသေးချိန် စာသင်ရန်နေရာနှင့် စာသင်ခုံအခက်အခဲရှိသည်မို့ သူ့အခန်းကျဉ်းလေးထဲမှာပင် ဆွမ်းစားစားပွဲချကာ သင်တန်းဖွင့်ရလေသည်။

အခြေခံပညာကျောင်းသူ ကျောင်းသားများအတွက် စနေတနင်္ဂနွေနေ့လည် နေခင်းများတွင် အင်္ဂလိပ်စာအခြေခံသဒ္ဒါ သင်ကြားပေးလေ့ရှိပြီး တက္ကသိုလ်ဝင်တန်းဖြေဆိုထားသူများ၊ တက္ကသိုလ်ဘွဲ့ကြိုဘွဲ့ရများအတွက်တော့ နေ့စဉ်ညနေခြောက်နာရီတိုင်း အသုံးချဗုဒ္ဓဘာသာနှင့် အင်္ဂလိပ်စကားပြောသင်တန်း (Applied Buddhism and Communicative English Course)ကို ပို့ချဖြစ်ခဲ့သည်။ သူ့သင်တန်းလေးတွင် ကျောင်းဂေါစရဂါမ်မှ ကလေးများသာမက နီးစပ်ရာတပ်နယ်အသီးသီးနှင့်ဌာနဆိုင်ရာဝန်ထမ်းသားသမီးများ၊အခြားဘာသာဝင်ကလေးများလည်း ပျော်ရွှင်စွာ တက်ရောက်ကြသဖြင့် သူကြည်နူးရလေသည်။

သူ့အခန်းကျဉ်းလေးတွင် သင်တန်းဖွင့်လှစ်ပြီး နှစ်ရက်ခန့်အကြာ ညနေခင်းအင်္ဂလိပ်စကားပြောသင်တန်းကို သူတက်ကြွစွာ ပို့ချနေစဉ် သူ့အခန်းးပေါက်ဝတွင် အရိပ်နှစ်ခုကို တွေ့လိုက်ရသည်။ သူ့အခန်းပြတင်းပေါက်မှ လှမ်းမြင်ရသော ကျောင်းရှေ့မျက်နှာစာနေရာအသီးသီးတွင်လည်း အရိပ်များစွာ ရှိနေခဲ့လေသည်။

တြိဂံဒေသတိုင်းစစ်ဌာနချု့ပ်တိုင်းမှုး ဗိုလ်ချုပ်သိန်းစိန်နှင့် ဇနီးဒေါ်ခင်ခင်ဝင်းတို့က သူ့စာသင်ခန်းလေးကို အကဲခပ်နေခြင်းဖြစ်ပါသည်။

သူဖျတ်ကနဲ ကြည့်ကာ သင်လက်စ စာကို ဆက်သင်နေခဲ့လေသည်။ တိုင်းမှူးဇနီးမောင်နှံက သူ့ကို လက်အုပ်ချီနှုတ်ဆက်ကာ စီနီယာသာသနာပြုရဟန်းတော်များကို ဖူးတွေ့ရန် ကျောင်းဆောင်အပေါ်ထပ်သို့ တက်ရောက်သွားခဲ့လေသည်။